& turrnenn menn till Crisstenndom
& till þe rihhte læfe,
Line 4285
& fullhtnenn hemm, & clennsenn hemm
Off all Adamess sinne,
Þatt haffde ben till all mannkinn
Full grimme dæþess wunde;
Forr þurrh Adamess gilltess dinnt
Line 4290
Wass all mannkinn þurrhwundedd,
& fallenn inn till eche dæþ
Inn helle wiþþ þe deofell.
& Crist comm dun to wurrþenn mann,
Forr þatt he wollde uss hælenn
Line 4295
Off all þatt wunde þatt uss ȝaff
Adam þurrh hiss missdede,
& forrþi maȝȝ þe Laferrd Crist
Wel nemmnedd ben Hælennde;
Forr mannkinn hæledd wass þurrh himm
Line 4300
Off sinness grimme wunde.
& tiss name off þe Laferrd Crist,
Þatt ȝe nemmnenn Hælennde,
Iss writenn o Grickisshe boc
Rihht wiþþ bocstafess sexe;
Line 4305
& itt iss nemmnedd IESOϒS
Affterr Grickisshe spæche;
& iwhillc an bocstaff þatt iss
Uppo þiss name fundenn
Tacneþþ an tăle rihht full wel,
Line 4310
Swa summ icc shall nu shæwenn.
