Þurrh Godess ȝife streonedd wass
Off faderr & off moderr,
Onnȝæness kinde þohh swa þehh,
Forr baþe wærenn alde.
Line 250
& her icc wile shæwenn ȝuw
Off þise twa Goddspelless,
Hu mikell god teȝȝ lærenn ȝuw
Off ȝure sawless nede;·
Þiss Goddspell seȝȝþ þatt Sannt Johan
Line 255
Wass her to manne streonedd
Upponn Heróde kingess daȝȝ;
& tatt wass Godess wille;
Forr Godess Gast itt haffde seȝȝd
Þurrh hiss profetess tunge,
Line 260
Full mikell fresst biforenn þatt
Þatt Crist comm her to manne,
Þatt Godess follc, Judisskenn follc,
Þatt Godess laȝhess heldenn,
Aȝȝ sholldenn habbenn allderrmenn
Line 265
& kingess off hemm sellfenn,
Aȝȝ — till þatt Godess Sune Crist
Himm shollde onn eorþe shæwenn.
& swa itt wass aȝȝ — till þatt Crist
Wass borenn her to manne.
Line 270
Forr aȝȝ þeȝȝ haffdenn allderrmenn
& kingess off hemm sellfenn,
Till þatt Herode wass hemm sett
Hæþene mann to kinge,
