A woolff fro beestys kept thyn hooly heed —
Thy legende makith mencioun:
O blyssed martir, of mercy take good heed,
Save thy ffraunchyse, thynke on Bury toun!
Suffre no tyraunt thy ffredam to as|saylle,
Line 385
Noon oppressour ageyn hem to maligne,
Thynk on thy spere greetly did avaylle [Ms. on, st. ou = hou?]
Ageyn kyng Sweyn — a thyng notable & digne
To be regestryd and shewyd for a signe —
Whoos tyrannye was ful dere abought". —
Line 390
Anothir myracle with this to combyne,
I wyl remembre, which on the lond was wrought.
Which on the lond ffyl also but late
At which (!) an hour, not ferre out of the toun,
In a subarbe callyd Rysbygate.
Wheer a yong babe lay tournyd vp so doun,
Line 395
Nat fful two yeer age, as maad is men|cioun,
His syde vpward, ffolk can repoorte weel:
Which was that tyme to his conffusyoun
Ovir-redyn with a carte-wheel.
The chyld oppressyd lay in the streete deed,
Line 400
Blak al the boody, the eyen cloos of sight.
A neyhbour casuelly took heed,
Hent vp the chyld, bar it anoon right
Off compassyoun in al haste that (s)he myght, [Ms. he st. she.]
Line 405
With wepyng eyen and fface fful pitous,
Namly whan she sauh the chyld so dyght,
Ded in hir armys brought to the ffadrys .hous.
This sodeyn caas myght nat be kept cloos,
Thorugh the streete the clamour gan to sprede.
Line 410
Greet noumbre of ffolk attonys vp aroos.
Among which wysest ffolk took hede
And gaff counsayl at so streyght a nede,
With woofful cheer seide vnto oon and alle,
Off hih prudence thus oon gan hem rede:
Line 415
First on ther kneen that they shulde ffalle
To make ther vowes, alle that wer present,
Withoute abood or ony long tarying [Ms. aboord.]
To bere this chyld al be oon assent
Bare on ther ffeet vnto ther blyssyd kyng,
Line 420
Diversly to make ther offryng.
Compendiously this myracle to descryve,
Our lord Jhesu took heed to ther axing:
Off his mercy the chyld gan to revyve.
Space of an hour this litel chyld ded lay —
Line 425
Tokne of lyff nor signe was noon seyn.
Off Jvle in soth vpon the VIII day
Soone vpon noone they gan prey ageyn,
To the hooly martir ther orysoun to seyn
Aboute the chyld vpon ech partye.
Line 430
Whoos preyers were nat maad in veyn:
Cryst lyst his martir fforto magneffye,
In laude of hym did hym greet ffavour:
By whoos merytes and mediacioun
The child restooryd ageyn to his vigour.
Line 435
The peple aroos with greet devocioun,
Cam to the shryne on processyoun,
With Joye and wepyng medlyd euere a|mong,
Te deum songe, with devout knelyng,
Ave Rex gentis was afftir that ther song.
Line 440
The Priour last this myracle gan pur|poose —
The peple abood with greet reuerence —
The trouthe toold, ther was no ffeyned gloose,
Lyk as it ffyl declaryd in sentence
Vnto alle that wer ther in presence,
Line 445
Yive them this counsayl above al othir thyng
To sette ther trust with entieer dilligence
In blyssed Edmond, martir, mayd, and kyng,
"Which shewyd hath in this myracles two
Our lord above of his magnifficence,
Line 450
Off oold tyme and now of newe also,
To shewe to yow by notable evidence
How this martir of royal excellence
Prefferryd is in the hevenly consistorye
With gloryous kynges to holde residence,
Line 455
Crownyd with seyntes euer to regne in glorye. Amen."
Now lat vs alle with hertly conffi|dence
Requere this martir to graunte thynges thre:
With spere & arwe to stondein our diffence
Geyn them that caste to breke his liberte,
Line 460
To savehis chirche, his toun, and his cuntre,
Mawgre alle thoo that in ony wyse
Wolde interupte his royal dignite
Be deregacioun doon to his ffraunchyse.
Explicit.
