A voys fro heuene oure lord dede sende,
Þat alle it herde þat þer werej:
Line 730
"My ȝatys ben open, my leue ffrende,
Come to me, my douȝtyr dere!
To suffre þe deþ in þe name off me,
Douȝtyr, drede þou no-wyȝt!
Be-ffor me schalt þou corownyd be:
Line 735
For hedyr hast þou longe I-tyȝt.
Þe cumpany off aungelys schene
Schal come agayn þy soule bryȝt
And brynge þe to þis place clene,
Þer euere is day & neuere nyȝt.
Line 740
Come, my douȝtyr! come now smerte!
For herd is now þyn orysoun.
For alle þat þe haue in here herte
And blely here þy passyoun,
And alle þat on þe calle in nede
Line 745
Wiþ hertely deuocyoun,
Off here prayer schole þey spede
And þer-to haue my benysoun."
Off þis answere, when it was herd,
I-wundryd was many a man.
Line 750
Sche stoupyd doun vndyr þe swerd —
Here swyre was whyt as ony swan.
Swyþe he smot here hed off þere —
But for þe blood þe mylk out ran.
Aboue here stood þat manquellere,
Line 755
He was ful blak, he was ful wan.
Anon come aungelys from þe ayr
And flowe awey wiþ here body,
And beryyd it, þat swyþe was fayr,
In þe mount off Synay,
Line 760
Þere gaff þe lawe god off heuene
Vnto þe prophete Moysy.
