Oft he was wroþ & wode,
Bot neuer ȝete as he was þo!
Her heuedes he dede of smite —
Þer-of ȝaf he nouȝt a slo.
Line 620
Þe bodis on þe feld wer cast,
Wiþ houndes & wiþ bestes also.
Her soules come sone þider
Þer ioie & blis is euer & oo. [oo = ever.]
Þerafter on þat oþer day
Line 625
Þe king was sett in his chayer;
Þe sarraȝins þat wiþ him held
On ich half þai sete him ner.
Katerine he hete forþ bring.
To fechen hir went his iayoler.
Line 630
Bifor him com sche swiþe sone
Wiþ bliþe mode & glad chere.
Ful sternliche loked he hir on
And spac to hir wiþ gret enuie:
"Miche wo þou hast ous wrouȝt,
Line 635
Þou wiche ful of felonie,
Þou hast me don mi folk forlese.
Þat þou schalt ful dere abie!
No schaltow neuer, ȝif y may,
Bitray ous wiþ þi sorcerye.
Line 640
Bot þou trowe on mi godes,
Þat al þis warld schal wake & weld,
And to hem make sacrifise,
Fram wicked deþ þou miȝt þe schilde;
Oþer men schal þine heued of smite
Line 645
Wiþouten toun in þe feld
Þis ich day, ar euen com —
So men schal þi seruise ȝeld."
Þis maiden no forbar him nouȝt,
Sche said: "þou tirant, nay.
Line 650
Schalt þou neuer þe day abide
Þat y schal leue opon þi lay.
Graced be þe king of heuen,
Þat me haþ lent so stable fay!
