Horstmann, Carl, ed. b. 1851., Barbour, John, d. 1395.
20. In festo sci Petri ad uincula*. [Siehe Tib. fol. 251—252a 1.]).
Saint Peter, þat was pape of Rome
And curature of cristendome,
In Jerusalem prechid he*. [T Jherusalem.]
And in sere places in þat cuntre,
Þe same tyme þat saint Jams was tane
And with king Herod sakles slane.
And when king Herod wist ilkdele
How þat it payed þe iewes wele Page 103
Þat James was so done to ded:
Þar-fore he soght in ilka stede
Cristen men where he migh(t) ta,
And many ane he stroyed swa.
And saint Peter at þe last*. [T And to.]
He pursued and in preson cast,
And þare to kepe him he cumand, —
For þare hegh fest was nere cumand
Þat pasch was cald in þat cuntre:
Þan used þai grete solempnite
And in þat day þai wald noght do
Thing þat ani charge fell to.*. [T any.]
Þarfore Herod, þat fals feloune,
Set saint Peter in presoun
And thoght wele þat he suld be slane
When þaire fest war fulli gane.*. [T fully.]
He was set in a dongon depe,
And sextene knightes him forto kepe.
And þe men þat went with him are,
Praied ful fast for his wele-fare,
To Crist þai cald with gude entent,
With-o(u)ten hali kirkes cumandment.*. [H with oten.]
So it fell on þe night biforn
Þat he suld die opon þe morn:
In þe preson he fell in slepe,
Bitwene þe knightes þat gan him kepe,
Bun with cheynes strang and store;
And stalworth men stode at þe dore,
And al obout þe hows þai stode,
It forto zeme with wapin gude.
And at midnight þe men ilkane
Fell in slepe, and waked nane.
In-to þe preson come a gleme
Brighter þan þe sunes beme,
And ane angell come in þat tide
And towched Peter on þe side;
He said unto him on þis wise:
"Smertly bid I þe up rise!"
Þe cheynes fell þan fra his hend,
And up he rase, als he him kend.
Þan sayd þe angel to him sone:
"Do on þi gere, biliue haue done!
Al þi clathes þou do on þe*. [H And al, and fehlt in T.]
And hose and schose, and folou me!"
Þan did he als þe angel bad,
A(n)d folowed furth with hert glad;
And no-thing wist he what it ment,
Bot with þe angell euyn he went;
And in his hert he trowed bitwene
Sum uisioun þat he had sene.
Both furth þai went omang þam all,*. [T Bot.]
Til þai war past þe secund wall,
And till þe zates past þai plaine:
Þat euyn was opind þam ogayne.
When he was broght þus on þis wise
Fra þe daunger of his enmyse
And, whare he wald, ful wele might ga,
Þan þe angell past him fra —
And how he went þan wist he noght.
Þare stode he stil and him bithoght,*. [T still.]
And musand on þis ferly fare
On what manere he might cum þare.
Fra þe presoun whare he was laid,
And to him-self al þus he said:
Nunc scio uere quia misit deus e. c.*. [H felt st. self.]
"Now wate I wele in mine entent
Þat god of heuyn his angel sent,
Me to bring þus of my bandes
And help me out of Herodes handes
And fra þe despite of þe iewes
Þat me ilkaday with euyl pursues".
Þan loued he god hertly omang
And thoght wheder him was best to gang.
To Mari hows he whent onone*. [whent st. went.]
Þat moder was of James and John:
For þare war of his frendes Inew
Þat in þe trowth of Crist war trew
And lufed him right wele I-nogh —
Þarfore unto þam he drogh.
He knokked on þe zate with gude will:
And sone a maiden come þar-till.
And when scho saw þare Peter stand;
In ogain scho went rinand,
Þe zates still zit left scho sperde,
And tald þam hou scho Peter herde,
Scho said þam þat þe zate he stode.*. [H þat st. at.]
And þai threpid on hir scho was wode:
"Woman, þou ert wode, þai sayd, Page 104
Peter es fast in preson laid
And suffers payn withouten pere.
Wald god þat he war now here!"
Þe mayden affermid ay mare and mare
Herdely þat he was þare.
And þus whils þai war in debate, [folio 167]
Peter knokked eft at þe zate.
And sum of þam said: "lat it stand!
It es his gaste, I will warand".
Þe thrid time Peter knokked fast:
And to þe zate went þai at þe last.
And when þai saw saint Petir þare,
Of him þai all awonderd ware
And in þaire hertes had þai dred(e),
How he out of preson zede;
Bot of his come war þai ful glad.
And with his hand be stil he bad,*. [H bestil, T be still.]
So þat þai suld speke nomare
Ne no-man wit þat he war þare.
Bot in he went and to þam talde
Al-how he wan out of halde
And how oure lord him helpid had
Out of þe stede whare he was stad
Omang his famen, bundun fast
Wit iren sheynes and lokkes to last;
"And þarfore, said he, luke ze tell
Al þis ferly als it fell
Unto James and my breþer hende!
And haues guday, for I will wende!"
Þan went he till anoþer land,
Vnto þe pople ay precheand.
And in þat fer cuntre he dweld,
Till Herod and his force was feld. —
Bot how it fell, now will we loke,
With Herod and with þam þat woke.
On þe morn, when he was gane,
Sir Herod said he suld be slane;
And unto presoun sone he sent
And bad bring him furth in present.
Bot or þai wist, he was oway.
Þan had þai no word forto say.
Omang þam þan was mekill kare.
Bot þarof will we speke nomare;
Vnto oure proces will we pas
And tell wat þe encheson was
Whi þis ilk fest was namen swa*. [H namen st. named.]
Of saint Peter ad uincula.*. [Causa quare dicitur ad uincula.]
A duke dwelled in Rome sum tyme
Þat fele folk had under him:*. [H felle, T fele.]
Lord he was of þe Romaynes;
And cristen men he did grete paynes,
Þam to defoul wald he noght fyne;
And his name was cald Quirine.
He had a doghter þat was him dere,
And scho was set in sekkenes sere
Þat derid hir gretly day and night;
And Balbinie þat ilk mayden hight.
Þis ilk duke, of wham ze herd,*. [H he st. ze.]
Had in his preson ful fast sperd
Alisander, þe pape of Rome,
For maintenance of cristendom.
And þis ilk maiden trowed wele þan
Þat Alisander was haly man
Þat þare was set in preson strang;
Þarfore oft gan scho till him gang
And kissed þe fetters on his fete,
And th(o)ght he might hir bales bete.
Þus come scho oft, at no-man wist,*. [at=þat.]
& his scheynes ful swetely kist,*. [T cheynes.]
Hopeand he was a haly man.
An Alisander said to hir þan:*. [H u. T An.]
"Sese! he said, my dogter dere,
And kys namore my fetters here!
Bot seke þa fetters sone þou sall
Þat saint Peter was bun withall
In Jerusalem, when he was tane
With Herod þat wald him haue slane;
And kis þa fetters sone þou sale,
And, doghter, so saltou be hale.
And by þat signe saltou se
Þat a ful haly man was he."
Þe maiden thanked him of his saw
And toke hyr leue with lowting law.*. [T louting.]
Vntill hir fadir sone scho ferd*. [T fader.]
And tald him all how scho had herd,
How Alisander said scho sold
Be helid wele, iff þat scho wolde Page 105
Kis þe bandes, hir bales to bete,
Þat war opon saint Peters fete
In Jerusalem when he had paine.
Þan was hir fader ferly faine:
"If þis be funden suth, said he,
Þan sal þe pape deliuerd be."
Ful sone he ordan knightes hende*. [H ordan (so öfter), T ordand]
Unto Jherusalem forto wende,
To seke whar þe fetters might be funden
Þat saint Peter with was bunden.*. [T bun.]
Þan went þai furth, als he cumand,
And soght, till þai þa fetters fand.
Of þe finding war þai faine,
And hastili went hame ogaine.*. [T hastily.]
And when þe duke þe ffetters se,
"Gose to my doghter! sone said he,
For sertanly we sall asay
Wheþer þe pape said suth or nay."
Þan þe dukes doghter dere
Kissed þe fetters with ful gude chere:
And hastily was scho helid þan.
Ful meri made þai ilka man.*. [T mery.]
Þe duke þan for his doghter sake
Cumand þe pape fro presown take,
And turned him unto Jhesu Crist
And of þe pape þare was baptist,
And his menze euerilkane
Vnto Jhesu has þam tane.
And þe maiden þat I of mene
Vnto Crist ay keped hir clene.
Pape Alisander for þis resoune,*. [H his, T þis.]
Þat he past þus out of presoune
Anly for þir fetters sake:
Þarfore a kirk sone gert he make
And haloude it in saint (Peter) name*. [Peter fehlt in H u. T.]
And "ad uincula" þai cald þe same —
Þat es, als klerkes understandes,
In honowre of þa blisced bandes*. [H þai in þa corr.]
Whilk on saint Peter fete war fest
When he was in preson kest.
And when þat kirk al endid was,
Þe cheynes war ordand in a case
Of siluer and of gold ful schene,
So forto be keped clene.
And many folk þan of þe land
Come þeder with ful grete ofrand,
To kis þe cheines in þat place;
And god thurgh gudenes of his grace
Wroght uertu þare of folk in-fere
And helid men of sekenes sere,
And so to blis he gan þam bring —
Vnto þat lord be ay loueing!