ASHMOLE 61.
Testamentum domini.
Wyteh wele all þat bene here
And after schall be leue & dere
That I Ihesus of naȝareth
ffore lufe of man haue soferd deth
vpon a crosse with wondes fyue
Line 5
Whyle I was man off lye
I haue gyuen & made a grante
To all þat askys repentante
heuens blysse withouten endynge
Als longe as I ame þer kynge
Line 10
kepe I no more fore all my peynes smerte
Bot trew lufe of mannys herte
And þat thow be in charyte
And loue þi neyȝbour as I do the
Thys is þe rente thow schall gyff me
Line 15
As to þe cheffe lord of þe fe
Iff any man cane sey now
That I ne haue dyȝed fore manys prow
Raþer than man schuld be fore-lorne
ȝite wold I efte be all to-torne
Line 20
Wytnes þe dey þat turnyd to nyȝht
And þe sone withdrew hys lyȝht
Wytnes þe erth þat þan dyde quake
and þe stones þat all to-brake
Wytnes þe vayle þat thane dyd ryue
Line 25
And dede men rosse fro deth to lyue
Wytnes my modere & seynt Iohne
And oþer þat there were many one
In wytnes off þat yche thynge
Myne awne sele þerto I hynge
Line 30
