aȝen þe reule of charite. And sich gedring of lumpis bi sensible signes haþ not autorite of Crist but raþer repreving. For upon Good Friday Crist ordeynede him to be cloþid þries aȝens sich weddinge wiþ cloþis of colour and shap; and as Crist seiþ in reprof of siche sectis, Kynrede of hordom sekiþ siche signes; alle þe dedes þat þei done sownen to ypocrisie, and aȝens no men spake Crist sharplier.
And alȝif freris seien þat þei beggen for charite, whan þei have prechid for siche beggyng, and þat Crist beggid so, and bad hem begge þus, neþeles al þis speche is poudrid wiþ gabbinge, and, as ypocritis done, þei seken þer owen avantage and not þe worship of Crist, ne to profite of his Chirche. For if þei diden, þei wolden sue Cristis reule, and leve chargyng of þe puple boþe in noumbre and begging, and leve her heye housis þat þei propren unto hem, siþ Crist hadde no propre hous to reste in his heed. And as Macometis lawe takiþ myche of Cristis lawe, and meddliþ oþir lawis, and þere comeþ in venym, so doiþ Anticrist in þes newe sectis; and as þei bringen in breþeren bi falshede of lesyngis, so ben þer ordris groundid in falshede in ech side. And siche men mote needis disturble holy Chirche; and þus seculer clerkes ben ful of ypocrisie, boþ popis and bishopis and clerkes under hem. Crist forfendide to putte miraclis þat he had done to þe manhede of him for errour in bileve; but þe fend drediþ not to feyne absoluciouns and indulgencis wiþ oþir ȝiftis, þat God grantide nevere, to spuyle men of her money, and not for soule hele; for þan wolden þei ȝyve freely þes ȝiftis, as Crist ȝaf himsilf and bad oþirs do. And þus lower clerkes traveilen bi water and bi londe for to have benefices and propre possessions, more þan þei done for helþe of mannis soulis; and how ever þei speken, þei lyven al in ypocrisie; and þus whan men fiȝten, pleden, or chiden, charite is not þere ende, but pride and propre havynge. And þus it is of seculers þat ben weddid men; and so charite of men is blyndid bi ypocrisie, so þat no synne of þis world lettiþ now more charite; and so ypocrisie is more general synne, and more pryvy sin to begile men, and werst to dis|troien þe comoun peple, and al þis figureden Pharisees aȝens Jesus Crist.
