Select English works of John Wyclif; edited from original mss. by Thomas Arnold.

man, and bad þat þe bond of his witt shulde be opened. But Jesus bad þat þei shulden not preise him herfore bi his man|hede, and for þis mekenesse þei preisiden him more bi his godhede, and seiden soþ þat he made alle þingis wele, for he made deef men to heeren and dombe men to speken. For men deefid in Goddis lore he made to heere what God spake in hem, boþ in mandementis and conseilis; and herbi þei lerneden to speke; and so þre miraclis did Crist togidere, in savynge of mankynde; he made men deef bi synne to heere what God spak in hem, and men dombe fro riȝt speche to speke opynly Goddis lawe, and so, biside þes virtues to heere and to speke, God moved mankynde to do as þei shulden; and so mai men see how myche þei ben to blame þat ben dombe and deef in þis manere of worching.

ÞIS gospel telliþ bi a parable how eche man shulde love his even cristene; and, for siȝt pryntid in us of manheed of Crist techiþ þis lore graciously, þerfore bigynneþ Crist and seiþ on þis manere. Blessid ben þe eyen [iȝen, B; eyne, C.] þat seen þat ȝe seen; for Y seie to ȝou, þat many kyngis and prophetis wolden se þat ȝe seen and siȝen hem not, and here wordis þat ȝe heeren, and herden hem not. And lo a wyse man of lawe roos and temptide Crist, and axide, Maistre, what shal Y do to have þe blisse of hevene? For he wiste wele bi skile þat it was not ynouȝ to see þe manheed of Crist for to come to heven; for many þingis, as Scarioþ and bestis, siȝen Crist, þat weren not able to have blisse. But Crist seide to þis legistre, What is writun in þe lawe? how redist þou? And he answeride and seide, þat þe lawe biddiþ þat a man shulde love þe Lord his God of al his herte and of al his soule, and of al his strengþis, and of al his mynd, and his neiȝbore as him silf.