Þis same gospel expowneþ to what entent Crist seide þes wordis. Certis Crist seide þis, to telle what deeþ he shulde die. But þe puple answeride to Crist, and seide þat þei have herd of þe lawe þat Crist dwelliþ wiþouten ende, and how seist þou þat mannis Sone mote be hiȝed? who is he þis mannis Sone, and how shulde he suffre þis deþ? But Jesus saw how þis peple un|dirstood sumwhat bileve, and þei failiden on oþer side of þingis þat þei shulden undirstonde. And þerfore seiþ Crist þus: Ȝit a litil liȝt is in ȝou. Walke ȝe while ȝe have liȝt, þat derknesse take ȝou not. It semeþ þat þis peple wiste how Crist tolde þat he shulde die upon þe crosse for mankynde, and þerbi drawe his children to him; but it semeþ þei wisten not now þat Crist was boþe God and man, and bi his soule he mai not die, as he dieþ not bi his Godhede; but whanne he is deed bi his fleish, his soule passiþ and drawiþ from helle. And þus Crist seiþ þei have a litil liȝt, for þei have but litil bileve. But þei shulden walken in þis bileve, and so come to more liȝt; for ȝif þei walkyn in derkenesse of unbileve, þei gone amys, siþ al þat is not of bileve mote algatis be synne. For Crist seiþ afterward, þat, He þat walkiþ in derknes, he woot not whidir he goiþ. And so it is in goostli walking; he þat wantiþ bileve of Crist woot not for þat tyme wheþer he goiþ to hevene or helle, for liȝt of feiþ wantiþ him.
And, for Crist is bileve, þe which þat men shulden trowe here and se aftir clerli in blisse whanne þei ben clene come to hevene, Þerfore, seiþ Crist aftirward, þe while ȝe have liȝt, bileve ȝe in liȝt, þat ȝe ben children of liȝt; þe which liȝt is God himsilf. Here mai we se, in bileve, how feiþ is nedeful for to have, and how fleishli lif here is contrarie to Cristis crosse, and how þat worldli liif is dirk and makiþ men go from God.
