be dampned for strengþe of Goddis ordenaunce. And sum men ben in Cristis Chirche juste for a tyme, þat fallen fro Cristis Chirche for her owne folie, siþ þei breken Goddis heestis, and lasten ever þus unkynde. But þes fishes gon not but wilfulli out of Goddis net. But þis net is nevere ful bifore þat men ben in þe Chirche, as many as God wole have saved, wiþ oþer þat he wole have dampned. Aungels of hevene ben þo þat sitten on þe banke and drawun þis nett in þe see of þis world, and bringen hem to Crist at þe daie of doom. And so þis fishinge lastiþ in tyme of boþe lawis; but þes angels de|parten yvel men fro juste men; and bringen juste men to hevene, and senden yvel men to helle. And þus dwellingis in hevene for dyverse holi men ben diverse vesselis into which þei ben takun. And þe chemyney of fier is þe fier of helle; for alle sich manere of fier, glowing of þikke mater, shal be closid in helle at þe daie of dome. And how þis shal be fillid þe gospel telliþ after. Þe weping þat shal be in helle is sorewe þat dampned men shal have; and gnashing of her teeþ is harm of her lesing; and þis is more peyne þan þe firste is.
Alle þes þingis undirstonden Cristis disciplis; for oure good maistre tauȝte hem more speciali. And herfore ech bishop and ech curate in þe Chirche shulde cunne þis lessoun, to teche it to þe peple. For at þe dai of dome þes uncunnynge prelatis þat can not þis lore shal be unknowun for to come to blisse; and þerfore we shulden ouþer denye for to be prelatis, or, ȝif we ben prelatis, we shulden cunne Goddis lawe, and preche it to þe peple, ȝif we wolen come to hevene. And þus seiþ Crist of sich goode prelatis, þat herfore ech writere, tauȝt þus of God, is liche to an housebonde man þat ordeyneþ for his hous; siþ a prelate shulde more ordeyne for goostli fode þan an housebonde shulde ordeyne for bodili fode to his folk. And as þis ordeyning is betere, for þe soule passiþ þe bodi, so þis defaute of goostli foode is more dampnable bifore God. And þes prelatis ben not writeris þat ben tauȝt of God, for neiþer þei ben writun in þe book of liif, neiþer þei can write vertues in mannis soule. And so þes doumbe men ben not writeris in þe rewme of hevene, but raþer doumbe foolis in þe rewme of helle; for as þe fend is a king, so he haþ a rewme;
