and þe þridde for þe goostli fode þat soulis ben fed wiþ Crist in blisse. And so þei ben þree weddingis þat Crist is weddid here; first whanne he toke mankynde, and made it oo persone wiþ him; after whanne he takiþ his Chirche, and makiþ it oo spouse wiþ him; þe þridde wedding is particuler, whanne Crist takiþ oo soule to him. And so Crist is seid to turne aȝen fro bridalis on two maneris. First, whanne a man is deed þat Crist haþ ordeyned to come to blisse, Crist turneþ aȝen to his soule from dwelling wiþ þe Chirche in hevene. But Crist leveþ not þis Chirche, but on new manere dwelliþ wiþ þis soule. But þanne he must have dwelt bifore, or ellis þis soule cam not bi þis state. And so we shulden be liche to men þat abiden þe comynge of Crist, in tyme of deþ, or þe dai of dome. And þis abiding shulde alle men marke, for þis comyng is uncertein, and þis tyme is perilous; siþ þis drauȝt mot be wel drawen ȝif oure liif shal ouȝte profite. And so to þes comyngis of Crist shulde ech man make him redi; siþ Crist shal come and knocke at doris, and entre to hem þat ben wakinge, and redi to resseyve Crist wiþouten sleping in synne. And þis openyng shal be doon anoon, as liȝtnyng of sonne [sunne, E.] is in þe eir. And so Crist knockiþ at oure doris whanne he techiþ us signes of deþ, or signe of þe dai of dome; but þe laste knockyng is sudeyne. Ȝif a man be redi bifore to dwellen wiþ Crist wiþ|outen ende, þanne he openeþ to Crist, siþ þis openyng is redy|nesse. And þus seiþ Crist ful soþli, þat þes servauntis ben blessid whiche, whanne þe Lord comeþ, he findeþ þus wakinge. Soþeli, Y seie to ȝou, þat þis Lord shal girde him, and make hem sitte to mete, and passe and mynystre to hem. Þe sitting to mete of seintis, is confermyng of hem in blisse; þe passing of þis Lord bi hem is his shewing to oon and oþer. And al ȝif þis shewing be togidere, ȝit her taking is divers; and her diversite is signefied bi þis passing of Crist. Þis service is liȝt to Crist, for it is but Cristis shewing of his Godhede, and his manhede, in which seintis shal be fed.
And ȝif þis Lord come in þe secounde vigile, and eke in þe þridde, and fynde sich redynesse in þes servantis, ful blessid ben þes servantis, siþ þei anoon ben blessid of God. Þes þre vigiles þat Crist telliþ
