mannis lyf is medeful or dampnable bi Goddis lawe. And þus þe charite of Crist stretchiþ riȝtli wiþouten angle, to profit of Cristis Chirche, and not to profit of him silf. And þus Poul souȝte many mennis profit, and not his owne worldli wyn|nyng; for sich entent is algatis derk, and liȝt of God goiþ not þerby.
And herfore biddiþ Crist to us þat we shulde see þat liȝt in us be not derknesse, bi yvel entent; for þanne it is an yvel liȝt. No man is here in erþe þat ne God ȝeveþ him sum liȝt: as sum knowing and sum entent in coveiting of sum good. And ȝif þis liȝt be riȝtful, wiþouten angle of crokidnesse, þanne Goddis grace shyneþ wiþ him, and ellis his liȝt is derknesse; for sich crokidnesse bringiþ aȝen derknesse of mannis liif. And so, ȝif al þi bodi be al shynynge, havynge noo part of derknesse, it shal be shynyng al, and it shal liȝtne þee as a lanterne of shynyng. Þes wordis semen superflu and seid of Crist wiþouten witt. But it is aȝens bileve to trowe þus of Cristis wordis; and þer|fore we shal undirstonde þat þer ben two goodnessis in workes; goodnesse in kynde of workes, and goodnesse in vertues. Þe firste mai be wiþouten þe secounde, but þe secounde is þe betere; as ȝif a man bi ypocrisie ȝyve good to nedi men, þan his ȝyvyng is good and his work is ful of liȝt; but it haþ oonli liȝt of kynde and not liȝt of vertues. And þis techiþ Crist us: þat ȝif al þe bodi of oure workes be shynyng bi liȝt in kynde, and hav noo part of derknesse, neiþer in kynde ne in vertues, þanne it shal be al liȝt bi double liȝt of kynde and vertues. And þis secounde liȝt of vertues men shulden moche telle bi, and fle derknes in vertues, al ȝif þei have liȝt in kinde. For God lokiþ to þis secounde liȝt, and blessiþ men in hevene þer|fore; and for þe first liȝt of kynde a man mai be depe dampned in helle: as ȝif þou bi ypocrisie do good to þi neiȝbore, and die in þis ypocrisie, þou shalt be depe dampned in helle; and for þis good þat þou didist þou shalt be dampned wiþouten ende. And ȝif þou ponishe a man of þe Chirche, for double love þat þou hast, boþe to þe Chirche and to þis man, al if þou erre in þis man, supposing þat he be yvel, and he be good to siȝt of God, and God excusiþ þi ignoraunce for derkness hid to þee; ȝit þou maist be saif in hevene for þis yvel werk in his
