and two to anoþer, and to anoþer von, ech on after his owne virtue. And whanne he hadde delid þus, he wente anoon his pilgrimage. And of þes þree servantis, þe first, þat hadde fyve besauntis, wente and wrouȝte in hem, and gat oþer fyve; þe secounde, þat hadde two besauntis, wan oþer two; but he þat took oon, wente and dalf [dalve it, E.] in þe erþe, and hidde þe monie of his lord wiþouten encreese. And after long tyme cam þe lord of þese servantis and rekenede wiþ hem. And þe firste, þat hadde fyve besauntis, cam to þe lord and offride him oþer fyve, and seide; Lord þou ȝavest me fyve be|sauntis, lo I have geten over [om. E.] oþer fyve. And his lord seide to him; Wel be þe, good servaunt and trewe; for þou was trewe of litil, upon many þingis Y shal putte þee; entre in to þe joie of þi lord. Þe secounde cam nyȝe þat hadde two besauntis, and seide; Lord þou ȝavest me two besauntis, lo, oþer two have Y wonne ouer. And his lord seide to him; Wel be þee, good ser|vaunt and trewe; for þou was trewe of fewe þingis, Y shall putte þee upon many þingis; entre into joie of þi lord.
Þis o man þat wente þus in þilgrimage is comunli seid, oure Lord Jesus Crist, for he is o man among alle oþere. His wend|inge on pilgrimage is taken on two maners; comunli it is takun for his steyng in to hevene, for dwellinge in hevene is strange to mannis fleish. Þe secounde maner of pilgrimage of þis o man is clepid dwellinge in þis world bi manheed of Crist; for þis was strange pilgrimage to Cristis Godhede. And algatis in þis pilgrimage clepide Crist hise servantis, and ȝaf hem his goodis to profite wiþal. But þese þre manere goodis ȝovun to þes þree servantis, is comunli understonden upon two maneres, as doctouris varien in þese two pilgrimagis. For as a man is two þingis, þe spirit and þe bodi, so Crist is two kyndis, þe Godhede and þe manhede. As anentis his Godhede, his waundringe here, is pilgrimage; and as anentis his man|hede, his steynge to hevene is pilgrimage. And he clepide hise servantis bi a long cleping, fro þe bigynnynge of þe world to þe laste dai, but at þis dai of dome he makiþ a ful rekenyng. And siþ Cristis Godhede is everywhere, he mai wel clepe þese servantis, and ȝyve hem his goodis, siþ þei have nouȝt but of
