Whanne Crist seide þese treuþis unto þes hie prestis, Phariseis and men of lawe stoden gretli aȝens him, and stoppiden his mouþ wiþ many false wordis, and lettiden Crist to speke more, as a man þat spak blasfemye. And herfore þes lawyeris, for þes wordis of Crist, layen in awayte more to do Crist to þe deþ. And God wote where þe court wolde þus shape for men, þat seiden sharpli to hem þis sentence of þe gospel; and if þei done, þei ben þanne of þe secounde kynrede. For þis kynrede lepiþ from oo folk to anoþer; for it is now among Jewis and now among heþen men, and now comeþ aȝen, as þe fend hopiþ victorie, and failing of Goddis lawe, and growinge of mannis lawe. For noþing is beter post to likyng of þe fend. And siþ þis kynrede is now moost among prestis, as it was in Cristis tyme, trewe men shulden speke to hem sharpli as Crist dide. For þe fend haþ hem moost helperis in þis cause, and makeris of martiris bi pursuynge and sleynge. And ȝif þei senden men to hevene, þat is on wrong maner; but þei senden men evene to helle, as to her owne hous, for þei have exilid Goddis lawe, bi which þei shulden worche, and brouȝt in þe fendis lawe bi which þei rengnen.
And after seiþ Crist, how þes lawyeris aspieden how þei myȝten take ouȝt of Cristis mouþ for to accuse him, and so do him to deeþ; and þus þese ypocritis feyneden to fulfille her law. And þus it is to daie of þes hiȝe prestis; for þei hav newe lawis maad biside Goddis lawe to dampne men to deþ as open heretikes. And to do þis dede þei counseiliden not wiþ Goddis lawe, but wiþ foundun [founden, E.] heresies þat hemsilf holden, þat þei mai not synne ne erre in siche jugementis. But þei jugen for heretikes al maner of sich men þat seien þat þei shulden sue Crist, and leeve her worldli liif. Ȝif þei leven Cristis liif, and ȝeven hem þus to lordship, þei ben þe fendis children and open Anticristis; for þei mai not be Cristis children, but ȝif þei suen him, and holden hem in his boundis, and go not out by newe lawes, and speciali holde hem in mekeness and poverte. And here we mai assaie where þei doren be martiris.
