defaute of bileve lettiþ men to traveile in Goddis cause. But wordis of þis gospel ben yvel undirstonden of manye, þat, bi logik þat þei han, graunten þat alle þe heeres of seintis be knowen wel of God, but God woot not how many þei ben, for noon heeris ben þes alle, siþ þanne þei weren wiþouten noumbre, and ech greet þing in erþe were maad of partis indevysible. And siche errours þat men han in logik and in kyndeli science, bryngen men yn, as heretikes, to graunte after many fals þingis. Soþ it is þat God knowiþ alle þe partis of a man, and how many þes partis ben, for þei ben fewe to Goddis witt; and so ech þing þat God contynneþ [conteyneþ, E.] is maad of partis indyvysible, and o gretter þing haþ mo siche. But þis is hid to mennis knowyng, but after þei shal wite it wel, whanne God shal shew it hem in hevene.
OF O MARTIR AND BISHOP.
[SERMON LXIV.]
Circuibat Jesus civitates.—MATHEW ix. [35.]
ÞIS gospel telliþ of þe office þat shulde falle to Cristis disciplis. And so it telliþ how prestis shulde now, boþe more and lasse, occupie hem in þe Church in servise of God. And first, Jesus dide in dede þe lore þat he tauȝte. Þe gospel seiþ how, Jesus wente aboute in þe cuntre, boþ to more places and lesse, as citees and castellis, to teche us to profete generali to men, and not to lette to preche to a peple for þei be few, and oure fame shulde be litil, for we shulden traveile for God, of whom we shulde hope oure þank. Castels ben undirstonden litil touns, but wallid, as Jerusalem is clepid a cite bi Mathew; and sich grete castels ben clepid citees. And no drede Crist wente to smale uplondishe touns, as to Bethfage and to Cana in Galile; for Crist went to þese places, where he wiste to do
