litil of prys and uncerteyn in þeir mevynge, and ȝit God or|deyneþ for hem whanne ever þei liȝten upon þe erþe, more God shulde ordeyne for ech man, þat haþ a soule to Goddis ymage; and speciali for such men þat serven truli to her God more þan ony foul may, for þei ben not able to serve þus. And siþ God ordeyneþ þus for foulis, oþer men moten graunten God unwise, or moche more he shulde ordeyne for men, þat ben hise trewe servauntis. And þis resoun þat Crist makiþ moveþ trewe men þat han witt, to be hardi in Goddis cause, and for him to suffre martirdom; and no man can avoide þat oþer men shulden þus suffre, or ellis be untrewe to God, as ben þes heretikes. And þus seiþ Crist of Goddis wisdom, þat alle þe heeris of hise disciplis ben noumbrid to Goddis knowinge, and noon of hem mai fulli perishe; and siþ þes heeris of mennes heedis ben leste worþi of ony part of man, and noon of þese mai perishe þus, how shulden betere partis perishe? And þus ben martirs confortid to putte her bodies for Goddis lawe, for no part of her bodi mai þus perishe to harme of hem; and myche more soulis of siche men, and alle vertues of her soule, mai not perishe fro hem, for þe soule mai not be quenchid. And nedli after þe soule moten sue þe vertues þerof, as aftir a mannis bodi suen quantite and figure; and no drede, as God wole ordeyne, whanne he restoriþ a mannis bodi, noumbre and quantite and figure þat is moost acordinge to þis bodi, moche more God ordeyneþ to the soule vertues þat it shulde have.
And trewe we not to foolis here þat seien þat þis ben accidentis which God mai putte bi hem silf, and freeli take þes fro men, so þat neiþer in bodi ne in soule man hadde ony siche acci|dentis; as who seide, men moun be, al if þei hangen not on God, for siche a dependence of men is accident unto hem. Þese foolis moten lerne predicamentis and ten kyndis of þingis, and þanne þei moun se her foli, and folie of heresie þat groundiþ hem. And of þis concludiþ Crist treuli to hise apostlis, þat þei shulden not wille to drede, siþ þei ben betere þan many sparewis; and oure bileve techiþ us þat God kepiþ þingis after her valu, for if ony þing be betere, God makiþ it to be betere.
And so Crist spekiþ here a word þat shulde move men to
