fadir and siþ hate his modir; þe þridde tyme mut a man hate his wyf and þe fourþe tyme hise children; þe fifþe tyme he shulde hate his breþeren and þe sixte tyme his sisters; þe sevente tyme moost of alle he moste hate his owne lyf. First men shulden wite here what were to hate in þis gospel, for Crist moveþ algatis to love, and no tyme to envye; but here it is seid bifore þat þis hating is denying, and þis is, lovynge in ordre as þe þing shulde be loved. And so þes sevene þingis shulden be loved, but lasse þan Crist or his lawe; and þus puttinge bihinde of love, is hating þat Crist spekiþ of.
But ȝit sophistris replien here and seien þat many men comen to Crist þat han not þes sevene þingis, and no man hatiþ but þing þat is. But here men moten lerne to speke to þat witt þat Goddis lawe spekiþ. Here fewe men or noon comen to ordre of Crist, but if þei have fadir and modir oþer next or fer. Sum men have fadir and modir þat geten hem into þis world, and sum men han eldris bifore þat gaten sich fadirs and modirs, and alle þes ben clepid fadir in Goddis lawe þat is trewe. Adam and Eve hadde noon sich fadris, but þei hadden erþe and erþeli þing, and þes myȝten be clepid here modirs, and her fadir was mannis kynde; and as þei mosten nede be saved, so God was her fadir. And siþ ech word þat Crist seiþ is trewe to his entent, and he seiþ þat who evere doiþ þe wille of his Fadir in hevene, he is his broþer and his sister, and his modir also, no man wantiþ here þes frendis, al if þei wanten sich for a tyme; and if mennis eldris ben dede, þanne þei han suche for sum tyme [a tyme, E.] . And mannis fleishe is his wyf, and her workes ben hise children; and so ech haþ such a wyf, and sich children of his wyf; and so siche sevene þingis ben long|inge to ech man, and alle þes sevene shulden men love lasse þan þei loven Crist her God. And þis is þe reule of Crist, þat passiþ alle þes newe ordris, and who evere loveþ not Crist more þan alle þes sevene wantiþ charite, and brekiþ alle Goddis hestis. And þis is veyn religioun, and so, as we seiden bifore, who ever beriþ not his crosse and comeþ in lyvynge after Crist,
