goodis, for goodis moven men to love hem in ordre, and if men tellen to þese goodis þat her love passe [passiþ, E.] resoun, þanne þei tellen aȝen ['telle aȝen' is meant as the literal rendering of 're-nuntiare.'] her answere to þes goodis. But þis synne is in men and not in goodis, and þis tellinge aȝen is renounsinge of hem; as if a man be temptid to love an erþeli þing more þan his God, for fals undirstondinge bi which he can not weye þe riȝt weiȝte of love, þanne he forsakiþ his God, for love of þis erþeli þing. And if he staunche þis love, and seie to þis þing þat he wole not love it so myche, for þe love of God, þanne he renounsiþ to it, þat here he wole forsake it. Þe secounde word þat Crist seiþ, þat men shulden take her crosse, biddiþ þat men shulden make hem redi to suffre for Goddis love; for þe crosse bitokeneþ passioun in Goddis lawe, and þis purpos is nedeful Cristen men to have. And þe þridde word þat Crist techiþ here, þat whanne a man haþ þes two he shulde sue Crist, ech man shulde have in mynde and do it in dede; for he sueþ Crist, þat moveþ himsilf to holde Goddis heestis; for þis weie wente Crist and failide in no tyme to do his Fadris wille. And þis word answeriþ to þe Holi Goost, as two wordis bifore menen þe Fadir and þe Sone, for þe name of God þat is al myȝti answeriþ bi proprete to þe firste persone, and man shal denye himsilf for þis name; and so whanne we preien to God in oure Pater noster, we seien first to þe Fadir, Halowid be þi name. Þe crosse bitokeneþ þe persone of Crist, for he was done on þe crosse for love of mankynde, and shape him evermore to suffre bi comun counceil. And here aȝen þis Trinite synnen many men; as, he þat bi mannis lawe is clepid to an office, in which he mai not kepe him silf in charite, and answeriþ for þis name and takiþ on him þis office, þis man synneþ aȝens Goddis name, and denyeþ not him silf for love of God.
But after Crist ȝyveþ a reule to kepe þes þree þingis, and seiþ, Who so wole make his lyf saaf, mut nedis lesen it, lyvynge in þis world, but he þat lesiþ his lyf for þe love of Crist shal fynde it, in þe toþer world. Þat man lesiþ his lyf, þat puttiþ it
