dampned, al if þei done good for a tyme, ȝit þei han an yvel maner þat quenchiþ þe goode þat þei done. And so it is unknowun to men who dwelliþ þus in God; but ech man shal do good, supposinge þat he dwelliþ in God. And herfore rehersiþ Crist, as he haþ seid to his apostlis, I am a vyne, and ȝe þe braunchis, and so þat man þat dwelliþ in me and I in him, he beriþ moche fruyte, and upon þis shulden ȝe þenken, for ȝe moun do nouȝt wiþouten me. And so shulden we lerne þat vynes ben trees þat profiten not to mennis work but in beryng of her fruyt. So shulden preestis in þis worlde shapen her lyf to Cristis Chirche, not to be enheritid here, ne to be riche, ne to fiȝte, but to teche Cristis lore boþe in her lyf and in her word. And þus shulde ech man do, but sum more and sum lesse.
And aftir seiþ Crist, as here is seid, þat who þat dwelliþ not in him shal be sent out, as a kitt braunche, and so he shal drye and siþ be cast in to þe fier, and þere he brenneþ wiþouten ende in þe fier þat evere shal laste. For fendis of helle shulen gadere him boþe in bodi and in soule, and witnesse aȝens him how he servede hem aȝens God. And over þis bihetiþ Crist þis privylege to his braunchis, þat if þei dwellen in him and hise wordis dwellen in hem, bi brynginge [So rightly E; A includes the words in the italics.] forþ of hevenly fruyte, whatevere þei wolen þei shulen axe and it shal be done to hem. Þese hiȝe wordis þat Crist seiþ here, tellen witt hid to men. For many þenken þat summe ben fulli lymes of þe fend, and ȝit þei enden holi men and comen to hevene for her good lyf; and summe ben now holi men, as ancris [ankeris, E.] heremytes and freris, and efte þei ben apostataas and dien enemyes of Crist. Al þis is hid þing, for if siche men semen to do yvel, and summe siche semen to do good, as ben many ypocritis, neþeles þe ende is hid of which þei shulden take her name. And so God hidiþ þe qualite of siche workes of men here, for men shulden not dampne hem ne preise hem to liȝtli. And þus men maken hem over wise in jugement of holi Chirche, and in demynge of mennis lyf, þat þis goiþ to hevene and þis to helle, for God haþ kept to him þe knowinge of an ende, þat makiþ al. Þou maist knowe þat þis man is oþer a bishop or in sich office,
