þe peple and gladen hem in Goddis lawe. Sum men ben braunchis of þis vyne, þat dwellen in holy Chirche, and ȝit þei ben not þerof, al if þei lyve of þis vyne, and ben siche þat gaderen gredili Cristis patrimonye, as dymes and offringis and rentis, þat þei seien weren ȝovun to Crist; and wiþ þis þei done not þer office to quykene oþer branchis; and þes ben moost noious branchis þat ben plauntid in þis vyne, for þei maken most oþer men to rote and drye and falle fro þis vyne in to þe fier of helle. For no men ben of holi Chirche, al if þei ben þer|inne, but þese men þat beren fruyt and han love wiþouten eende.
After seiþ Crist to his disciplis, Now ȝe ben clene for þat word þat Y seide to ȝou, Dwelle ȝe in me and Y dwelle in ȝou. Boþe goode men and ivel moten be on sum manere in Crist, siþ he is God þat susteyneþ al þing; but men shulden be in him bi grace and take moisture of his lore, and so profite to oþer braunchis þat growen in þis vyne, and þus þei shulden take moisture of lore of þis tree, or ellis þei ben not of þis tree, al if her kynde be susteyned in it, but þei growen in kynde to make of a fier in helle. And þis vyne dwelliþ not in a man as for his membre, but if he helpe þis man to make here a good ende, and die in charitee to God and to his Chirche. And so, al if ech man shulde hope þat he be lyme of holi Chirche, neþeles he shulde suppose þis bineþe bileve and wiþ a drede, but if God tellde him specialy what eende þat he shal have. And þis triacle haþ God ordeyned aȝens preestis and ypocritis, þat þei shulden not disceyve þe puple, bostinge þat þei ben of holi Chirche, for, be þei popis, be þei bishopis, or oþer preestis more or lasse, þei bosten and hewen above her heed, if þei ben proud of þis title. And herfore God, þat loveþ þat ech man shulde be meke, hidiþ þis point from ech man þat he woot wole not holde mekenesse. And to conferme þis mekenesse, seiþ Crist after in þis gospel, As a sioun mai not bere fruyt but if it stonde stable in þe vyne, so no Cristene man mai bere fruyte but if he be dwellinge in Crist. And herfore seiþ Crist bi Matheu, þat a good tree mai not make yvel fruyte ne an yvel tree good fruyt, al if mennis jugement faile in þis, for þese þat God woot þat shal be saved, al if þei synnen for a tyme, neþeles her synful lyf shal turne to hem to fruyt of hevene. And so þese men þat shal be
