office in lordis courtis, leuynge cristene soules vngouerned & vntauȝt, for boþe þe lord & þe clerk don gret traiterie to god & his peple; & þat fals confessoures þat norischen men in synne for worldly worschipe, worldly wynnynge, welfare & ese, be hurled out of office & courtis for drede of schedynge of worldly venyme. ¶ Þe seuenþe, þat clerkis be meke & obeschaunt to worldly lordis, as crist & his apostlis weren, & be not norischid in grete synne by anticristis exempcion, leste cristene rewmes be distroied for suffraunce & meyntenynge of cursed synnes. ¶ Þe eiȝteþe, þat cristene men drede more þe riȝtful cursynge of god for brekynge of his hestis þen wrongful cursynge of synful men, þat cursen men for trewe prechynge of þe gospel & fulfillynge of þe werkis of mercy; for god blisseþ where þei cursen. ¶ Þe nynþe, þat pore men of þe rewme be not robbid for symonye of þe firste fruytis bi þe bischop of rome, ne bi þe bischepis at hom for halowynge of chirchis & auteris, & prouyng of testa|mentis & aquitauncis. ¶ Þe tenþe, þat cristene men ȝeue more credence to cristis gospel & his lif þan to ony bullis of synful bischopis of þis world, or ellis þei forsaken crist and taken anticrist & sathanas for here chief gouernour. ¶ Þe elleuenþe, þat þe sotil vsure of riche clerkis & marchaundes be hurled out of lond, & borwyng & lynynge be frely don to pore men for goddis sake. ¶ Þe twelfþe, þat no lege man of oure kyng [page 236] be prisoned for wrongful cursynge of prelat, þe while he is redy to be iustified bi holy writt & trewely don his office. ¶ Þe þrittenþe, þat who euere doþ most symonye & meynteneþ most synne be demed, knowen & tretid most heretik, most aduersarie of ihū crist & principal anticrist. ¶ Ȝif ony man kan proue bi holy writt or reson þat þes poyntis ben false, pore prestis wolen mekely ben amendid, & hertely preien alle goode men to helpe hem in here trewe cause for worschipe of god, helþe of here soulis, & saluacion of cristene rewmes.
¶ Þes ben eiȝtene poyntis to distroie grete wrongis & synnes & strengþe þe pees & charite in oure lond, ȝif þe kyng, lordis & comyns wolen practise hem wel.
