falsed; for cristene men ben certeyn of bileue, bi gracious ȝifte of ihū crist, þat þis treuþe tauȝt bi crist & his apostlis is þe gospel, þouȝ alle anticristis clerkis crien neuere so faste þe contrarie vp peyne of curs & prisonynge & brennynge. & þis bileue is not groundid on þe pope & his cardinalis, for þanne it moste faile & ben vndon, as þei failen & ben sumtyme distroied, but on ihū crist, god & man, & on þe holy trinyte; & so it may neuere faile but in defaute of him þat schulde loue god & serue him & faileþ in þes two poyntis, for almyȝtty god & his treuþes ben foundement of cristene mennus feiþ. And as poul seiþ, foundement may no man sette biside þat [l Cor. iii. 11.] þat is sette, þat is ihū crist. Þerfore þouȝ anticrist & alle þes [his X.] worldly clerkis ben biried depe in helle for here cursed symonye, pride, & coueitise & oþere synnys, ȝit cristene feiþ faileþ not; for þei ben not ground þer-of but ihū crist is ground þer-of. for he is oure god & oure beste maistre, euere redy to teche trewe men alle þinge þat is profitable & nedful to here soulis; & he may not faile in þis techynge but for vnablete of him þat schulde resceyue þis techynge.
Capitulum 5m.
Þe fourþe whel of belialis carte is þis: ȝif cristene men seyn þei knowen bi bileue þat þis is cristis gospel, þes malicious heretikis axen whi þei bileuen þat þis is gospel. but trewe men axen of hem aȝenward whi þei bileuen þat god is god; & ȝif þei tellen a good sufficient cause, telle we þe same cause whi we bileuen þat þis is cristis gospel. but þes heretikis wolden haue þis cause: for þes prelatis techen þat þis is cristis gospel; & þanne [omitted X.] þei wolden haue of þis cause alle here false purpos, þat what euere þes prelatis techen opynly & meyntenen stedfastly, were of as gret autorite or more þan is cristis gospel; [page 212c] & so þei wolden distroie holy writt & cristene feiþ, & meyntenen þat what-euere þei don were no synne. but cristene men taken here feiþ of god bi his
