þat þei tristen not to pore prestis & witty clerkis trewely techynge þe gospel & comaundementis of god & where men owe to do here almes, but lyuen forþ after [page 142] olde errouris & lesyngis & anticristis prechouris þat prechen for here wynnynge & fablis & newe soteltes for veyn name of clergie, & bidde hem do as here fadris diden, þat many tyme lyuede in falsnesse to gete goodis of þis world and myspendeden [myspenden X.] hem in pride & glotonye, & þei witen neuere where þei dieden out of charite & ben dampned in helle; & þus þei conseilen here maistris to lyue forþ in here cursede synne & not to amende hem.
Capitulum 20m.
Also þei disceyuen þe peple in feiþ of cristendom; for þei maken þe peple ween þat þei schullen not haue part of here preieris, þouȝ þei ben in charite, but ȝif þei paien moche money to a prest þat is ydel & vicious. for ȝif men wisten þat þei schulden haue part of alle goode preieris bi mercy of god as moche as is riȝtful, þei wolden do here almes to here pore neiȝeboris as crist biddiþ, & not fynde so many worldly prestis þat kunnen no goode & non wolen lerne, ne teche oþere men to lyue wel 2ne lyue wel2 [2_2 omitted X.] hem self. but þus þei maken hem maistris & lordis of goode preieris & sillen hem to men þat hem likiþ for money, & taken not reward to partynge of god, hou he is chief lord & grauntiþ part of good preieris to euery goode man þat is in grace as moche as is riȝtful.
Capitulum 21m.
Wykede prestis also disceyuen cristene men in hope; for þei techen þat men schullen haue more þank of god to do here almes to riche freris & false pardoneris & to make grete waste housynge, þanne helpe here pore neiȝeboris in cloþinge & housynge & out of dette & prison, & parische chirchis
