The English works of Wyclif hitherto unprinted.Edited by F. D. Matthew.

Also þei doren not reproue men of here opyn synnes bi forme of þe gospel for displeisynge of here maistris & leesynge of here salarie; for many of hem seyn þus: "I wole not displeise him of whom I haue my lyuynge." a, ȝe blynde foolis, drede ȝe more to lese a morsel of mete þan o poynt of charite? drede ȝe more to offende an erþely wrecche þan god almyȝtty? loue ȝe more wombe ioie & worldly myrþe þan þank of god & ioye of heuene? sette ȝe more prise bi ȝoure stynkynge bely þan bi ȝoure lord? ȝe reueren god & worschipen false goddis many weies & ben hugely cursed of þe holy trinyte & alle his aungelis. hou doren ȝe, cursed wrecchis, seie ȝoure masse in þis lif to ȝoure dampnacion, [1 Cor. xi. 29.] as god seiþ bi seynt poul, & ofte ȝe reden it.

Also for gostly liȝt of good ensaumple & trewe techynge þei hilden out foul derkenesse of many synnys; for siþ god seiþ bi his prophete þat a prest is aungel of god, þat is a [Mal. ii. 7.] messager to telle goddis wille to þe peple, & þei leuen þis & tellen lesyngis & wrecchidnessis of synnys, þei ben angeles of sathanas transfigurid into [& to X.] angelis of liȝt; for þei han name of holynesse & of goddis trewe seruauntis & ben not so in dede. & siþ crist seiþ in þe gospel þat prestis owen to be [Matt. v. 13, 14.] salt of þe erþe & liȝt of þe world, þat is myrrour & ensaumple to make men bareyne fro synne & bi liȝt of trewe techynge brynge heþene men to cristene feiþ, hou ben þei not traitours to god [page 140] & procuratouris of sathanas whanne þei leuen þus gostly lif & trewe prechynge of the gospel & ȝeuen ensaumple of synne & boldnesse þer-inne?

Also worldly prestis ben anticristis disciplis, sekynge here owene worldly honour [hous X.] & wynnynge more þan goddis, &