Capitulum 8m.
Þe eiȝte defaute; þei shitten þe kyngdom of heuene bi|fore men, & neiþer gon in hem self ne suffren oþere men to entren; for þei shitten holy writt, as þe gospel & com|aundementis [Matt. xxiii. 13.] & condic[i]ounes of charite þat ben clepid þe kyngdom of heuene, bi here false newe lawis & euyl glosynge & euyl techynge; for neiþer þei wolen lerne hem self ne techen holy writt, ne suffre oþere men to don it leste here owene synne & ypocrisie be knowen & here lustful lif wiþ|drawen. & þus þei closen cristis lif & his apostlis fro þe comune peple bi keies of anticristis iuridiccion & censures, & maken hem not so hardy to seye a treuþe of holi writt aȝenst here cursed lif, for þat schal be holden detraccion & enuye & aȝenst charite; & þerfore þei make þe peple to sue here techynge & here statutis & customes & to leue goddis techynge, & herbi leden hem blyndly in-to helle; & þus closen þe kyngdom of heuene fro hem & leden hem to helle bi here blynde ypocrisie & coueityse, as crist seiþ hym self. [omitted X.]