Capitulum 30m.
Ȝit þes possessioners disceyuen lordis bi feynynge [fyninge X.] of special preieris; for þei maken lordis to bileue þat here special preiere, as famulorum & benefactorum, schal turne to lordis aftir grauntynge & lymytynge of synful foolis, & more principaly to hem for here worldly goodis ȝeuynge þan to oþere men þat ben in more charite; & þus þe riȝtful delynge of god for þe goode lif of men is forȝeten, & delynge of synful foolis þat knowen not þe ablenesse of men & riȝtful dom of god is holden forþ; & herby myȝtty men ben brouȝt out of bileue to triste more in special preynge & appliynge of synful men þan in þe riȝtful partynge of god & riȝtwis|nesse of here owene lif, & bi trist of suche special preieris lordis vnderstonden þat þei schulden be excused þouȝ þei don euyl in here owen lif. lorde! siþ none of alle þes religious whot where his preiere turne to his owene dampnacion, hou doren þei chaffaren þus wiþ worldly possessions & rentis for here preieris; siþ þei owen to wyten þat here preieris ben cursed & abhominable to god, for þei breken cristis hestis in holdynge þus seculer lordischipis, & lyuen in pride, coueitise, ypocrisie, glotonye & ydelnesse, þat drawen hem to synne of sodom & maken hem worschiperis [worchiperis X.] of false goddis.