Capitulum 10m.
Ȝit þes proude possessioners ben anticristis martiris, for þei [page 112] ben reised bi hym fro deþ of [or X.] worldlynesse and vanyte to lif of lordis and werris & falsnesse; for in here profession þei ben holden dede to þe world & vanyte & [of X.] likynge þer-of. But in desirynge & holdynge seculer lordischipis & worldly honour & delicat mete & drynk & gaye cloþis þei schewen in dede þat þei ben riȝt freisch in bodely lif, but I suppose þat þei ben dede to holynesse & penaunce & profitynge to oþere men; & namely þei schewen þis reisynge in pledynge & werrynge in here owene persones, & in counseilynge oþere men to werre on cristene men for worldly goodis; for þat þei don more cruelly þan worldly lordis, as men knowen of pletynge & conseilynge to werris. þerfore it semeþ to summe men þat þei feynen hem dede to gete pray of worldly lordi|schipis & richesse; as þe fox feyneþ hym dede til [to X.] briddis comen to his tounge, & þanne he schewiþ hym on lyue deuourynge & swelwynge of hem; & þus þei ben dede to profitynge of oþere men & here temporaltees ben mortesid, þat is confermyd in þis deþ, for þei comen neuere to seculer men ȝif þei may, þouȝ þei ben getyn bi neuere so fals title & aȝenst conscience; for þei wolen not see mennys riȝt, ne worsche aftir good [omitted X.] conscience, but bosten of þousand markis & þousand poundis þat þei wolen coste in plee bi-fore þat þei lesen ony fote of lond; & of suche religious wrecchis seiþ Robert grosted þat siche on is a dede careyne gon out of his sepulcre wlappid with cloþis of mornynge, [morynge X.] dryuen & stirid
