The University of Michigan Library provides access to these materials for educational and research purposes. These materials are in the public domain. If you have questions about the collection, please contact mec-info@umich.edu. If you have concerns about the inclusion of an item in this collection, please contact libraryit-info@umich.edu.
DPLA Rights Statement: No Copyright - United States
Also prelatis constreynen prestis to lese charite & blaspheme crist & disceyue his peple; for þei neden prestis to fiȝtte & werre in here owen persone aȝenst cristene men, & here abouten spende pore mennys liflode for to hauen a veyn name of hardynesse & þank of lordis þat kunnen neiþer witt ne reson; for þei senden opyn comissions to alle curatis vndir here deuelis iurdiccions bi vertue of mahoundis obedience & bi manas of þe kyngis power to make hem
redi wiþ armure to werre iolily aȝenst cristene men. ¶ And here-by is armure of pacience and charite and holi preiere & trist in god putt awey, & þe deuelis lawe of cruelte, enemyte & veyn trist in mannys myȝt brouȝt in. But goddis curs renneþ many þousand tyme wiþ al þis. & here-bi ben half dede men confortid to fiȝtte & slee cristene men & rennen to helle hedly; & so þes worldly prelatis ben chef capteyns & arraiouris of sathanas batailis to exile good lif & charite, but certis no tonge in þis lif may telle hou many soulis gon to helle bi þes cursede capteyns & anticristis iurdiccion & censures.