Page 87
Capitulum 18m.
Prelatis also ben worse þan iewis þat naileden crist on þe cros, for þei pursuen crist in his membris for þei seyn þe treuþe aȝenst here cursed lif, & sclaundren hem wiþ lesingis, & cursen hem & prisonen hem & slen hem, algatis in wille. And, as crist seiþ, it is all on to dispise & pursue on þat seiþ þe treuþe of crist & to pursue crist god & man. And þis newe pursuynge of prelatis is don bi more sutil ypocrisie & after more benefice resceyued of cristis passion, & whanne it were most nede to haue helpe in goddis cause aȝenst anticristis clerkis [omitted X.] þat destroyen þe treuþe of cristis lif & his apostlis in word & dede; & ȝit prelatis resceyuen & axen gredely þat ilke money for whiche iust blood is spilt, þat þe iewis wolden not do; & ouer þis prelatis sillen cristene soulis to sathanas for money, & so in manere defoulen cristis blood & setten it at nouȝt; & bisien hem nyȝt & day hou þei may bi anticristis iurdiccion & feyned censures stoppe prestis, þat þei prechen not þe gospel to delyuere soulis out of þe deuelis bondis.