The English works of Wyclif hitherto unprinted.Edited by F. D. Matthew.

dampnable but ȝif he be assoilid of hem Ȝif he haue space þer-to, pouȝ þei ben cursed heretikis & enemyes of crist & his peple. & þus þei taken litel reward to god whanne he seiþ, what euere tyme a synful man haþ so enteire sorowe for his synnes he schal be saaf. þes prelatis schulden preche þis contricion & mercy of god & ioies of heuene, & þe peril of schrifte wiþ-outen repentaunce, & foulnesse of synnes, & grete peynes of helle, & riȝtwissnesse of god to make þe peple to flee synne & kepe trewly goddis comaundementis, & not disceyuen hem bi here owene power of assoilynge, ne bi fals pardon ne fals preieris & oþer nouelries bi side goddis lawe. of þes þre & fourty errouris & heresies may men see hou euele prelatis disceyuen cristendom. For of hem & non oþere is þis speche, & hou þei ben cause of werris & euele lif in þe peple, and of here dampnacion. God for his endles myȝt and mercy amende þes errouris and oþere, ȝif it be his wille. Amen.