Thys made the sayde Pocock, as it was seyde.
And after thys he was pryued of his bysshopryche, hauyng a certeyne pensione assigned vn to hym for to lyue on in an abbey, and sone after he dyed. [[A.D. 1460.?]]
Afterwarde this same yere, was holde a counseylle at West| [A.D. 1458.] mynstre aboute Shroftyde, to the whiche came the yong lordes [[February.]] whoos fadres were sleyne at Seynt Albonys; that ys to sey, the [folio 194b] duke of Somerset, the erle of Northumberlond, and his brother lord Egremount, and the lorde Clyfforde, with a grete power, and were loged withoute the walles of Londoun aboute Templebarre and Westmynstre. The cyte wolde nat receyue theym, because they came ageyns the pease. The duk of York and the erle of Sales|bury came but onely with theyre householde men in pesyble manner, thynkyng none harme, and were loged wythynne the cytee; for they abouesayde came forto dystroy vtterly the sayde duk of York and the erle of Salesbury, and of Warrewyk; and the cyte was euery day armed forto withstonde the malice of tho yong lordes yef nede had be. And sone after came the erle of Warrewyk fro Caleys, wherof he was capteyne, and lay wythynne the cyte.
Thanne the byshoppys and other lordes tretyd betwyxt theym of the pease and accorde, and after long trete bothe partyes submytted theym to the laude and arbytrement of the kyng and his counselle. The whiche after good deliberacione and avysement yaf this awarde and arbitrement; that xlv.li. of yerely rente shulde be amorteysed and founded in for euermore by the sayde duk of York and the erles, in the abbey of Seynt Albons, where the forseyde lordes so slayne were buryed, for to pray for theyre soules and for the soules of alle tho that were slayne there. And ouer this the sayde duk of York and the erles shulde pay to the duke of Somerset and to hys
