Whanne the duk of York and the erles herde this aunswere, thoughe the toune were strongly barred and arrayed for defence, they and theyr peple brake doune vyolently howses and pales on the este syde of the toune, and entred in to seynt Petres strete sleyng alle tho that wythestoode theym. Thanne came the kyng oute of the abbey wyth his baner dysplayed in to the same strete, and duke Edmond wythe hym, and the duk of Bokyngham, the erle of Northumbrelonde, and the lorde Clyfforde, and the lorde Sudeley beryng the kynges baner; and there was a sore fyghte, as for the [folio 191b] tyme, and there at laste was slayne the seyde duke Edmond, the erle of Northumbrelond, and the lorde Clyfforde; the kyng that stoode vndre his baner was hurte in the necke wythe an arowe. And when the seyde duke Edmonde and the lordes were slayne, the batayle was ceased. And thus was done the Thurseday the xxij. day of May.
Thys sayde Edmond duke of Somerset had herde a fantastyk prophecy that he shuld dy vndre a castelle; wherefore in as meche as in him was, he lete the kyng that he sholde nat come in the castelle of Wyndsore, dredyng the seyde prophecy; but at Seynt Albonys ther was an hostry hauyng the sygne of a castelle, and before that hostry he was slayne.
When this was done, the forseyde duke of York and the erles re|torned to Londoun, and had the kyng with theym.
And at this bataylle were slayne lx. persones of gentilmen and of other.
[Anno xxxiv.] A.D. 1456.
And this same yeer, in the moneth of Juyne was seen stella comata, betwene the northe and the est, extendyng her bemes towardes the sowthe. The whiche sterre was seyenne also in the court of Rome, as they reported that came fro thens.
Anno xxxv. A.D. 1456-7.
The xxxv. yere of kyng Harry, and the yere of oure lorde Ml.CCCC.lvij. [Michaelmas, 1457, was in the 36th Henry VI. Holinshed places the second prodigy here mentioned under November 1456.] a pylgryme that alle his dayes had be a shipmanne,
