An English chronicle of the reigns of Richard II, Henry IV, Henry V, and Henry VI written before the year 1471; with an appendix, containing the 18th and 19th years of Richard II and the Parliament at Bury St. Edmund's, 25th Henry VI and supplementary additions from the Cotton. ms. chronicle called "Eulogium." Edited by John Silvester Davies.

was put ayens thaym, and made a lawe and an ordenaunce, that yf the parlement appelid or enpechid eny man of eny cryme, he sholde be dampned withoute ansuer, for with the parlement he myȝte not fiȝte; and made the parlement appele meny men of meny thyngis that thay were not gilti of, and exilid for euermore the forsaid duke of Yrlond, ser Michael de la Pole, and maister Alisaunder Nevile, archbishop of York, and dyvers othir. And thay made alle men of the parlement swere to obserue and kepe alle the ordenaunceȝ and statutis that were ymaad in the saide parlement; and made also the kyng swere agayne forto kepe his laweȝ, and that he shold folowe the counsel of his trewe lordeȝ, and not of suche flaterers as were aboute him; and that he sholde nevir hurte ne enpeche eny of thaym for that thay hadde do in the said parlement; and of this the kyng, though he baar it hevili, graunted unto thaym a chartre of pardoun.

And this yeer deide maister John Wiclif, and was buried at [fragment Ca] Lutterworthe, where he was parsoun; but aftirward, be sentence of the chirche, his bones were take vp and brent.

The xij. yeer of king Richard, duryng this same parlement, he leet crie and ordeyne general justis at Londoun, in Smythfeld, for alle maner straungers, and othir that thider wolde come: and thay of the kyngis side were alle in on sute, thair cotearmuriȝ, sheldis, hors-trappuris, and alle, was white hertis, with cronneȝ aboute thair neckis, and cheynes of gold hangyng ther upon, and the cronne hangyng lowe befor the hertis bodye, the whiche hert was the kyngis liverey, that he gaf to knyghtis and squiers and othir.

And atte firste comyng to thair justis, xxiiij. ladieȝ ladde xxiiij. knyȝtis of the gartir, with cheyneȝ of gold, and alle in the same sute her (sic) of hertis as before is said, fro the tour of Londoun, on horsbak, thorouȝ the cite of Londoun in to Smythfeld . . . . .

thorough alle Spayne, that the duke hadde sente in to Engelond for [fragment Cb] a grettir ost; and the kyng of Spayne wenyng it hadde be trewe,