64. JOHN FRENDE TO THOMAS STONOR [c. 1462]
Right worshipfull maister, I recomaunde me unto yov: letyng yov wete that Thomas Baron, John Peperell, the son of Robert Peperell, mauneseth me dayly, and put me in suche fere of my lyffe, that with other the servauntes of Ric. Fortescu, that I dere not go to cherche ne Page 57, vol. 1 to chepyng. Also now late the seid Baron and Peperell have sklaunder me that I schuld sende divers men to the hous of the seid Thomas; and ther and at that tyme the seid persons, that is to wete John Gune, John Cleveff and other, schuld take theefly xxvj. s. viij. d. of the godis of the seid John Peperell, vj spones of silver of the godis of Thomas Barons, and a girdell with silver harnes of his susters, and divers polen, and brynge althis to the hous of John Frende of Ermyngton: and there and at that tyme then schuld recette: uppon the whiche sklaunder and un|true noyse the seid John Frende hath made his purge with meny wor|shippfull gentilmen and gode yoman. Wherefore I pray yov that ye see a meane that I may be in ese: for hit is worse than ever hit was: for ye have seid many tymes that ye wold come thether, and dwelle ther: and that thay putteth in uterance daily that we schalbe undowe, for ye nel never come to helpe us. Also I pray yov that my maister Drayton may se this letter, and be enformyd thereof. And also I pray yov to take hede above, and make gode wacche for Thomas Baron. And Thomas Horne bethe come uppe to London a fote, for make labour ayenst me. Also but ye come and defende me, I wille do the service no lengher, for I may not ne dernot. And for the sege for my maisteres is made after your device.
By your servaunt John Frende of Ermyngton.
To Thomas Stonor, squyer, in hast.