60. JOHN ELMES TO THOMAS STONOR 6th FEB. [? 1457]
Right wurshipfull syr, and my good Maister, y Recommaunde me to yow: and please hyt your Maistershyppe to wete that the Sonday next after my departynge fro yow I come to Hendeley at vij of the clocke in the mornynge, and whan I had herde masse John Mathew come to me fro my lady youre syster, and told me that there had be certain persones at my place at Falley and have take a distresse thre horses of my ten|auntes, whiles that he was at the Chyrche at matyns and have caried hem away: and they have seled up the halle dore with a wrytynge ther apon, what the wrytynge is I wot not as yet: and thys was don wythoute any knowliche or wetynge of my lady, or of any oficer of hereys: where|fore my lady, your syster, wuld that I shuld wryte to yow of this mater, for she feryth that here fraunchese shuld be hurt or broken, becawse of this doyng &c. And syr, I beseke yow to be my goode Maister: for be my trouth I nevir dede any thynge in the mater syne I was with Maister Fowler, and suche promys as I have made on to yow and to Maister Fowler y shall trewly kepe hyt. Also syr, my tennant, Robert Cockes, is a hevy man becawse his hors be take away. I can nor wyll not gefe hym no comfort, onto that I have wurd fro yowr Maistership, that wote Almyght Jhesu, who have yow, Right worshipfull syr, evyr in his blessed kepyng, Amen. Writen at Hendeley in hast the same Son|day that the dede was don, the vj day of Feverer.
By your servaunt John Elmes.
To Right worshipfull syr, and my goode Maister Thomas Stonar, this be delivered.