The Stonor letters and papers, 1290-1483; ed. for the Royal historical society, from the origial documents in the Public record office, by Charles Lethbridge Kingsford.
Kingsford, Charles Lethbridge, editor. 1862-1926.

36. JOHN STOKE TO EDMUND DE STONOR c. 1380

The following letter in the Collection (A.C., xlvi, 29) is also addressed by John Stoke to Edmund Stonor, but is too mutilated for transcription. From A.C., xlvi, 28.

Treshonoree sire, et trescher cosyn, moult vous merci de touz voz grauntez bountez et naturesses, queux de jour en aultre mauez fait saunz nulle desert. Entendaunt, treshonoree sire, qe jai receu voz lettres a moi directez, merci, touchant la bargayn des terres et tenementiz de Johan Babby en Clayore, les queux lettres jai pleinement entenduz. Pur quei, treshonoree, vous requeor, si pleiser vous soit, si vous semble qe la bargaigne serroit pur nostre proffit, qe faire voillez la dite bargaigne, et jeo vous envoiera xx. li. deinz la feste de seint Hiller prochein avenir. Et les aultres xx. li. serront paiez a quell heoure qe nous sumus sure dez ditiz terrez. Endroit, sire, del lautre bargaigne, de quelle nous entreparlamus a nostre derrein entreparler, vous requer qe vous moi plese certifier vostre voluntee en escript a pluis toust qe vous bonement purre. Et si rienz voillez devers moi, tout temps prest moi trouverez comme le vostre. Lui seint esprit vous eit en sa gard, et voz honurs encresce en bon sauntee et long dure. Escript a Bristuyt le xv jour de Decembre.

Vostre Johan Stoke de Bristuyt.

A son treshonore syr et cosyn Esmond Stonore.