The Stonor letters and papers, 1290-1483; ed. for the Royal historical society, from the origial documents in the Public record office, by Charles Lethbridge Kingsford.

34. WALTER ROUS TO EDMUND DE STONOR c. 1380

From A.C., xlvi, 25.

Honoures et totes maneres de reverence. Trescher sire, vous pleise entendre qe Ricard Hoghes de Dudecote ad fait fyn pur xl. s. pur ses tenementz illoesqes, et qe vous averez la vache de heriet Johan son piere: et Cristine Beiteres, vostre neife, femme Johan Toughe, chapelayn, si ad graunte de fyn pur ses terres et tenementz reaver xl. s., et pur ij acres de furment iij acres dorge et ij acres de puls vij marcs dargent: et Rauf Kyng, le graunt seignur, si ad graunte vij marcs pur le detenue de Michel, vostre bercher, pur deux jours; dount nous sumez acordez, si vous le volez assentir par bones [p]legges a moi troves; mes ils de|maundent longe jour de paiement, de quele chose nous ne sumez acorde saunz vostre assignement. Et Henr. Pighurde, vostre provost, et moi ne poomps acorder par nule voie de sa fyn unqore, et je luy ai graunte

destre descharge de son office par treys ans proscheyn avenir pur xl. s., au quele demande il ne voet assentir: pur quei, trescher Sire, vous plese envoier par vostres lettres a moi par le porteur de cestes tote vostre volonte des choses avauntdites, auxi bien des jours de paiement des fyns, com del fyn vostre provost illoesque, sil serra ataunt ou nennye cest assavoir xl. s. Trescher sire, luy trespuissaunt vous encresse en honours et bountees, et vous doigne bone vie et longe a tous jours. Et graunt a la meme del garsoun voillez entendre qe son piere luy de . . . et encountre resoun, et dist qils sount . . .: de . . ., mes mest dist de verite qils serrount troves vos . . . vostre Wauter Rous.

A mon treshonore Sire et Maistre Esmond Stonor.