The Stonor letters and papers, 1290-1483; ed. for the Royal historical society, from the origial documents in the Public record office, by Charles Lethbridge Kingsford.

330. SIMON STALLWORTH TO SIR WILLIAM STONOR 9 JUNE 1483

Printed in Excerpta Historica, p. 16. From A.C., xlvi, 206.

Master Stoner, after dew recommendacons, I recommend me to youe. As for tydyngs seyns I wrote to yove we her noun newe. þe Quene kepys stylle Westm., my lord of ȝorke, my lord of Salysbury with othyr mo wyche wyll nott departe as ȝytt. Wher so evyr kanne be founde any godyse of my lorde Markues it is tayne. Þe Priore of

Westm. wasse and ȝytt is in a gret trobyll for certeyne godys delyverd to hyme by my lord Markques. My lord Protector, my lord of Bukyngham with all othyr lordys, as well temporale as spirituale, were at Westm. in þe councel chambre from x to ij, butt þer wass none þat spake with þe Qwene. Þer is gret besyness ageyns þe coronacion, wyche schalbe þis day fortnyght as we say. When I trust ȝe wylbe at London, and þen schall ȝe knove all þe world. Þe Kyng is at þe towre. My lady of Glocestre come to London on thorsday last. Also my lord commendys hyme to yove, and gave me in commaundement to wryte to you, and prayes you to be god Master to Edward Jhonson of Thame. He wass with my lord, and sued to be made a denyson for fer of þe payment of þis subsedy: and my lord send to Jeves þe clerke of þe corone and sawe þe commissione and schewyde to hyme þat he schold pay butt vj s. viij d. for hymeself: and so wer he better to do þen to be mayde denyson, wyche wold coste hym þe thyrd parte of his goods. And as for suche as have trobyld with in þe lordchype of Thame my lord wylbe advysyd by you at your commyng for þe reformacion, yf ȝe take note or ȝe come: for he thynkes þat þei schalbe punyshed in examplee of othyr. And Jhesu preserve yove. In haste from London by þe handys of your servande, þe ix day of June.

Simon Stallworthe.

To the ryht honorabille Sir William Stoner, knyghte.