The Stonor letters and papers, 1290-1483; ed. for the Royal historical society, from the origial documents in the Public record office, by Charles Lethbridge Kingsford.
Kingsford, Charles Lethbridge, editor. 1862-1926.

314. JOHN PAYNE TO SIR WILLIAM STONOR 15 MAY [1482]

This was clearly written in the same year as No. 305, and may safely be assigned to 1482. From A.C., xlvi, 195.

Right worshipfull Syr, and my right especiall gode Mastere, I re|commaund me unto you with right herty and manyfold thankynges for þe great favour and mastership, þat ye have showed me in diverse wises &c. And forþermore þat it woll please you to knowe, or I departed owte of London, þere whas certayne knowlage þat þis gentlewoman whas sacred, wiche whas don þe Freyday byfore my commyng to Hamptons place: þe said parties were commyn to London or I came thens: this knowen, I hadd no cause to tarie. I fere me lest M. Barkeclay colored in þis work. Never þe lasse I shall thynke it myn infortune. I pray God I may here after doo you sum pleasyr for þe labour, charge, and goode maistership, þat ye shewed me in þis behalfe. Also such en|commaundements as ye gave me to Master Rishe and oþer at London I remembred thayme as I cowde. And also delyvered your letter to Hugh Hownton. Also nowe I am sorye þat my lady Ane departeth from þes parties: for my lady and all þe houshold shall hastely to Dertyngton, and þere remayne and byde a season. Syr, if þer be any servyce þat I can doo att your commaundment in þes parties, ye shall have me at your pleasyr, and will duryng my life, þat to juperde to þe utterest of my power, that knoweth our blessed Lord, whome I beseche to preserve you in long helthe and prosperous filicite. Scribled at þe Castell of Taunton, þe xvth dai of Maii,

One of your servaunts, John Payne, Wt my lord Marquis.

Unto the right honorable and my full goode Master, Sir Willm. Stonor, one of the knyghtes for the Kynges body, be þis takyn.