306. DAME ANNE STONOR TO SIR WILLIAM STONOR 27 FEBRUARY 
Syr, I recomaund me unto you in my most h[ert]y wise, right joyfull to here of yowre helthe: liketh you to knowe, at þe writyng of þis bill I was in good helthe, thynkyng long sith I saw you, and if I had knowen þat I shold hav ben this long tyme from you I wold have be moche lother then I was to have comyn into this ferre Countrey. But I trust it shall not be long or I shall see you here, and else I wold be sorye on good feith. Syr, I am moche byholdyng to my lady, for she maketh right moche of me, and to all the company, officers and other. I have early trust uppon your comyng unto þe tyme of thassise, and else I wold have send Herry Tye to you long or þis tyme. I have delyvered a bill to Herry Tye of suche gownes as I wold have for þis Ester. And I beseche oure blessed lord preserve you. From the Castell of Taunton þe xxvij day of Februarer.
Your new wyf Anne Stonor.