300. JOHN SHYNNER TO SIR WILLIAM STONOR [? 1481]
Ryȝth reverent and worcheppell Mayster, I recommende me on to yowr Maysterchepp allso hertely as I can and may: prayeng yowr Maysterchepp to gete me a subpena for John Rowse, apon þat he was ynfefyet yn treste to follfyll my fader ys wyll, and John Leghe and Water Torryng, þe weche John Leghe and Water Torryng be þe partyd of þis worll, and so John Rowse is alyve, and y deser he scholde folfyll my fader ys wyll. And yn þe reverans of God laboryd ye to be scherve: for hyt ys a presentabell offise, þe worcheppefollyst yn þe scher have ben schervys and yet theye hope to be: and Wylyam Fowell sayde to me þat Syr Thomas Selynger hopyt to be scherve þis yer: and Wylyam Fowell sayd hyt wer all so convenyant and presentabell to yow as to hym, and sayd hyt well be worth to yow a C. nobelys abow all costys and awayll mene hoder man onder yow: and yef ye be scherve I beseche yow that John Tollocke may be creyer of þe schere, and he shall plese yow also largely as heny hoder schall, þe weche John Tol|locke ys my soster sone. And I have send on to yowr Maysterchepp for my wrethe of subpena by the berer of thys byll ij. s. vj. d. And yet Page 135, vol. 2 yn þe reverens of God remembret yowr sylve to labor to be scherve: for hyt well gete yow a quayntens, and hyt ys beter to goveryn then to be goveryed. No mor on to yowr Maysterchepp at þis tyme, but Jhesu preserve yow ever. Amen. I-wrethen at Modbere on Synt Luke ys yeve.
By your aune Syr John Schynner, parson of Penyton.
To my Rygth reverend Mayster and pattron, Syr Wiliam Stonor, knygh.