298. SIR WILLIAM SANDES TO SIR WILLIAM STONOR [c. 1481]
Ryght Wurshypful and trusty Cosyn, y commende me unto yow yn as hartly wyse as y can and as a Jantylman not gretly acqueyntdyd with yow, trustyng yn tyme to come to be better acqueyntyd with yow. Syr, yf hyt please yow, y undyrstonde ye have a ffermer atte Penyton Meyse, the whyche as y undyrstonde for hys wylfull dysposycon and neglygent rewle yn the same bothe ayenst the welfare of yowre modyr and yowr heraftyr, ffor as y bothe her and yn parte know he ys a troubelusse ffelow not only with yowr tenauntes but as well with othyr Jentylmenys tenauntes yn lyke wyse: and so be thys meanysse he getyth hym selfe but lytyll love amonge them. And as y undyrstonde sumtyme as y walke yn my recreacon y may see that yn yowr wodys he hathe made grete waste and destruccon, the whych shuld cause a grete displeasour to me yf hyt were y-doo yn my wodys as hyt ys yn yowre, as ye may have larger undyrstondyng of thys yn yowr next comyng unto the contre: where upon yf hyt please yow, yf case be that ye have made no graunte of the sayde ferme, suche favour as ye may y wul pray yow to shwe the . . . man, the whych comyth with yowr Chapleyn, parson and Curate of the sayde Penyton, and y truste he shall deserve hyt . . . to yow aftyr hys power so that he may have your goode mastyrshyppe: and as for hys trouth and suche covenauntes as [he shall] make with yow, and Page 133, vol. 2 ye desyre me, y dare be bownde for hym for hys trouthe and for suche covenauntes that he makyth [y will] fynde suffycyent suerte by syde to perfourme yn hys behalfe. And upon thys y have desyryd yowr parson to ryde to y[ow with] hym to keve yow ynformacon of hym what he ys. And as he knowyth ryght well he ys for yow and such a man [as] shall please yowe and all yowr tenauntes and odyr also, of whose comyng y wot well they wyll be ryth glad.*. [Sandes continued "of hys comyng," but crossed these three words out.] And Jhesus preserve yow bothe body and sowle. I-wrote at Andever on Corpus cristy day, hastie,
W. Sandes knyght.
To my Ryght trusty and welbelovyd Cosyn Sir William Stonor thys letter be delyveryd.