292. JOHN YAXLEE TO SIR WILLIAM STONOR [? 8 JULY, 1481]
Ryght reverent and worshipfull Sere, I recomaund me to ȝou &c. Sere, my Mastres Harlston recomaundyth here to ȝou: and I am sure she wilbe glad iff I tell here of ȝour prosperous welfare, whan I come home: for in good feyth, sere, she was verry ffull off thought and ferd lest ȝe had ben sore seke or gretly diseasid, be cause she cowd not here from ȝour good Mastership many a day. Wherfor she desired me feythfully þat I shuld inquere of ȝour welfare, of þe whech I have herd at London þe certente, thankyd be Jhesu, ho have ȝour seid worshipful mastership in kepyng. Wreten at London, þe mornyne next after Seint Thomas Day with þe rude hand of ȝour feyþefull servaunt, hos name is John Yaxlee.
To my ryght reveren[t and] worshipful master Sere Willm. Stoner, in hast delyvered.