The Stonor letters and papers, 1290-1483; ed. for the Royal historical society, from the origial documents in the Public record office, by Charles Lethbridge Kingsford.

275. H. MAKNEY TO [SIR WILLIAM STONOR] [17 SEPT. 1480]

Clearly written to Sir William Stonor, and, from the reference to Lady Stonor's illness, probably in 1480. From A.C., xlvi, 180.

My Ryghte reverente and my syngler gode Maistire, aftire due re|comendacion, Sire, pleasithe to wete þat my lady is in gode hele, blesside be Jhesu, and recomendide unto youe with alle here herte and mynde, and alle your servantes also, and praythe daily for your prosperite and wusshuppe, in especiall for your sone comynge home &c. Syr, your parke gothe welle onewarde in dikinge and in pale, your husbondrie in like wise, and befe and moten wex, and the state, [Perhaps "stots," or it may be "stace" meaning "stock".] with alle odire vitaile, and specially money. Y pray youe remembre your lente stuffe. Y wulde have be with youe my selfe or þis tyme, but y ame so grevyde in my bakke þat y may nethe ride ne go. We hire of your grete and importune chargis latly leyde on youe, whiche causithe alle your frendis to be y-ryghte full sory therofe: but y beseche Jhesu contynue youe in honoure as ye have begon, and þat ye may furnysshe your selfe in alle abilymentes of werre lyke unto your ffelowshyppe beynge in rome as ye are in. And also my lady hath sente here water unto M. Derwothe to undirstonde his conceite, ande howe he demyth by here water whedir she be in wey of mending &c. On Soneday nexte afor sente Mathewes day, at Stonore.

Your servaunte, H. Makney.

To my Ryght Worshipfull Maister.