255. H. CARNEBULL TO SIR WILLIAM STONOR 16 NOV. 
Right worshipfull Sir, I recommaunde me unto you: thanking you for my grete chere this day made me at your place, but not for your park spoort, where in your defaut John, your parker, þat wold have bene my frende, is my gret enmye. I have received your letter con|teynyng þat ye wol do my lord service in thoffice of Stewardship at Thame, and þat for þe same ye will geif me xlvj. li. xiij. s. iiij. d., payyng hit at ij tymes, that is to wete at Michelmes next commyng xx ij. li., and at Candelmes þenne next folowyng the residue, which amounteth to þe somme of xxiij. li. xiij. s. iiij. d. Sir, I knowe þat my lordes mynde and pleasur is þat ye have hit, which I wil folowe in þat and in al thing duryng my lif, and so am y bounden. To your desired daies of pay|ment I wil therfor agre, and of your and myn aggrement I shal wryte unto my lordes good lordship. Sewe ye for your patent as soone as my lord cometh to Woborne, and when ye have hit sendeth it to Lincoln þat your graunte may be confermed by þe chapitour ther. To morowe I will be at Bannebury and ther until Monday next: from thennes to Leicester, and ther until þe morowe next after seint Kateryn day: so to Newerk, and ther until ij daies afor seint Nicholas day: thenne to Lin|coln, and ther by viij daies. Yf your patent be brought while y am ther, Page 94, vol. 2 I shal speke for þe spede þerof, so þat y trust your servaunt commyng þerwith shal not be taried. John Daunce shal to morrowe to Ricote and labour to gete you a copie of Quatermayns patent. Yf hit may be goten ther, William Lentalle, your servaunte, can advise you how ye may gete hit from Herry Davers: for Lental telled me þis same day he supposeth þat Herry hath hit. Yf hit may not be goten of hym, let Lental remember þe Scrivener þat made Maister Foulers patent, with whom y suppose a mynewte or copie resteth, and ther dooth hym to fette hit. I sende you herynne enclosed a copie of the wordes entred by Maister Auditour for þe allowaunce of þe Stewardes ffee, upon þe which copie ye may conceive your patent by counseile lerned, yf þe remanent faile. Oure lord kepe you. At Thame, in hast þe xvjth daye of Novembre, with þe owne hande of hym þat is yours to my litle poer.
To the right worshipfull sir, Sir William Stonore, knyght.