The Stonor letters and papers, 1290-1483; ed. for the Royal historical society, from the origial documents in the Public record office, by Charles Lethbridge Kingsford.

Jhesus.

Ryght enterly and my moste specyall belovyd husband, I recomaunde me to yow yn the moste harty wyse, desyryng to here of yowre welefare &c., thankyng yow of yowre lettyr and of yowre partrechys. And for Robert Warner, he ys cum to towne: dyverce of yowre servantys and myne have spoken with hym: he seyeth that he can receyve no money as yet, notwithstondyng he yntendyth to speke with me or he departe, and wyll content me yef he may. I pray God that he may so do. Also I pray yow to send me a answere of the mater that I wrote to yow for the Lumbarde. And yef hyt myght plese yow to take the labur to ryde ovyr, then ye may answere to the mater yowre selfe, whyche wyll be to me grete hartes ese and plesure: for I thynke hyt ryght longe syth I speke with yow. Syr, I truste to Jhesu to se yow here yn shorte

tyme. No more to yow at thys tyme, [but] Jhesu preserve yow yn hys kepyng. Wrytyn at Lundun the Fryday afore sent Bartylmewys day.

By your owne wyff Elysabeth Stonore.

To my most enterly belovyd husband Syr Wylliam Stonore, knyght.