175. ELIZABETH STONOR TO WILLIAM STONOR 7 NOVEMBER, 1476
Jhesu. M. iiijc lxxvj.
Ryht enterly and beste belovyd husbond I recomand me unto you in my most hartyest wyse that I beste can or may, sartyfyyng you that I have receyvyd your letter of John Stute and iij coppull of conyes and bald reybbys with the chyk, the whyche I thanke you for als hartyly as I can. Also I conseve by your wrytyng that you have had very meyche a do with holdyng of cortes and odir besynes, the [wyche], as I pray God son to send you a nend thereof, that I myght [see you] here. And Syr, as tocheyng the hogeyshed of salte that you wrote [to] me for, Page 18, vol. 2 truly Syr I wold a sente yt to you with alle my harte, but þe bargys wer departyd before your letter cam [unto] me. Also, Syr, I have reseyvyd sen you departyd ij letterys frome my [sun Bet]sun as on Monday last wase, on of them deectyd to you. . . . . The whyche letterys I have red and wele undirstond them [. . . I] conseve by hese wrytyng that he ys very lothe that Elmys woll . . . departe frome heme: never the less he thynkithe that xiij markes and a d[i . . .] pryse for to bye lx saks: after that pryce it wold draw myche m[oney] and lytell gettyng suld be therin. And yet I truste to . . . . . have yt, for as I undirstond yt ys yete unsold . . . . . that my sun Betsun sent to me by the brynger [herof . . .] I pray you grete wel my broder Thomas Ston[or from me desiring y]ou to seye to heme that I marvyll gretly what [. . . moveth] heme to saye schoyche langege by me as he dothe, for as . . . [that] I [wold] plok from your lyelod alle that I can to make a grete . . .: for þat I wote welle you can awnswere for me wele enowe. And so I . . . to defend me. No more to you at thys tyme, but I beseche all myg[hty Jhesu] have you, right ynterly and best belovyd husbond, in nys [blyssid kepyng ever] Amen. At London the vij day of Novembr.
My owne good [husb]ond I se well ye [re]membre þe puttyng at . . . out off þe bed whan you and I lay last togedyr.
By your ovne [to my] powre, Elysabeth Stonor.
To my Right worshipffull husbond [Wyllm.] Stonor, Sqyer, thys letter be delyverd in hast. d. d.