174. JOHN RYTTE AND JOHN CRICHE TO WILLIAM STONOR [? 2 NOV. 1476]
Worschipfull maister, I recomaunde me to your maistershipp &c. Where as we were appointed to sytte at Modbury, we myght not so dele, but ryde a bakwardes to Exceter and cary jurers with us to your cost and charge more þan we were advisid þat hit schuld have be. Never|thelesse your charge is resonable ese, be meanes of John Fortescu, Strecchle, and oþer your welwillers: and as for Thomas Mattheu paid to þis charge no peny nor no day will sette to paie: also ye most cause Maister Fouler to thanke þe sheriff of Devon for he shewid large good will for Foulers letter to you. Also I advise you to speke with my lorde of Clarence is feoder, I-callid Robert Holbenne of Greysyn, that he will not trouble your tenaunte; for seith pleinly he will distreyne for þe iij part of a knyghte-fe xxxiij. s. iiij. d. I-writ at Exceter on all Soules dai last past.
By your servauntes John Rytte and John Criche.
To Will. Stonore, esquier.