The Stonor letters and papers, 1290-1483; ed. for the Royal historical society, from the origial documents in the Public record office, by Charles Lethbridge Kingsford.

132. THOMAS TALYOUR TO THOMAS STONOR [before 1474]

From A.C., xlvi, 80.

Most Reverent Wurschypfull Mayster, I recummande me unto your Maysterschyp, desyryng your prosperyte and helth, wych all myghthy Jhesu preserve to his plesur and your hertes ese. Besekyng yow as I schall be your pore Bedman to have ȝevyn me lysens to have goyn hom to my cuntre to have spokyn with my ffader, sendyng for me under thys forme: yff y wolde have his blessyng or any thyng þat schulde be my forthurans þat I schulde speke with hym in all þe hast þat I kolde. Besekyng yow to have grantt me thys, and to have sende sum mone for my spendyng: and as long as I am from you I schall serve after my terme, iff hit be plesur to your Maysterchyp &c. Allmygthy Jhesu preserve yow.

Your pore Servaunt in that I kan or may Thomas Talyour.

Unto my most Reverent and Wurschypfull Mayster, Mayster Thomas Stonor, Esquier.